# 滋賀縣田中酒造之旅：百年酒藏的故事
- Buddy Sake
- 7月2日
- 讀畢需時 2 分鐘
「Try the best, God will do the rest.」呢句說話係我參觀完田中酒造，坐JR回程時突然諗起嘅感受。年初嘅滋賀縣之旅，最深刻嘅地方之一就係呢間位於甲賀市嘅百年酒藏，田中酒造。佢離甲賀忍者村大約30分鐘路程，周圍環境都係舊式民居，真係一個遠離繁囂、充滿懷舊氣息嘅地方。
田中酒造由田中重哉先生同佢太太一齊經營，兩夫妻真係好有默契，分工合作得非常好。田中太太唔單止負責所有酒標設計，仲親手寫字，令每款酒標都變得獨一無二！而且，佢仲經營一間Café，所有蛋糕同食物都係佢親手製作，真係女強人嚟㗎！至於田中先生就專注釀酒同銷售，兩夫妻一齊守住呢個百年酒藏，真係令人佩服。
參觀酒藏嘅時候，最特別嘅感受就係入到去即刻覺得凍！室外只需要著件長袖Tee已經夠暖，但一踏入酒藏，就即刻感受到寒意，急急拎褸著上身先可以繼續行，估計室內溫度起碼比室外低5度左右。參觀嘅時候田中先生首先介紹嘅係酒藏入面嘅一口水井，井水係鈴鹿山水脈流經嘅伏流水。
獨特嘅低溫環境加上優質嘅超軟水釀出穩定又高質嘅清酒。
田中先生特別鍾意熟成酒，所以大部分出品都經過唔同時間嘅熟成。記得試酒嗰陣，田中先生突然拎住個實驗室用嘅Flask係酒缸斟咗壺清酒俾我試飲。我話好飲之後，佢即刻得戚咁話：「依家唔賣，出年先！」嗰種自信同對自己作品嘅滿意，真係令人印象深刻。
整個參觀過程中，我感受到田中先生對釀酒嘅熱誠，同埋佢對前人教授技術嘅尊重。佢話自己盡全力做好每一步，之後就交俾上天安排。可能就係咁樣嘅心態，加上天時地利人和，先可以釀出咁高質嘅清酒。
如果大家有機會嚟滋賀縣甲賀市，我真心推薦你去田中酒造走一轉！試吓佢哋用心釀造嘅清酒，再喺田中太太嘅Café度食返件蛋糕，絕對唔會令你失望！未有時間去參觀都可以先試一試田中酒造所釀嘅”春乃峰”感受下先.
留言